Otra paré Philips

Gracies a Ángel Solar que nos atopó otra paré Philips, esta vegada ta asitiada en: Piñera de baxo en L'Abadía Cenero, conceyu de Xixón

Compañía Popular de Gas y Lletricidá mientres la Guerra Civil Española

Nestos momentos tan convulsos de guerra Rusia-Ucrania, vamos recular nel tiempu para llegar al 5 de setiembre de 1936, cuando se llevaba apenes dos meses de guerra civil n'España.

Xixón permanecía nel bandu republicanu y nel documentu que presentamos de siguío puede apreciase que magar el vale tien el membrete de la Compañía Popular de Gas y Lletricidá" el sellu que lu robla indica "LLUZ Y FUERZA - Sociedá de gasistes lletricistes y similares".

Vale de setiembre 1936 - Cía Popular de Gas y Lletricidá - Lluz y Fuerza

Publicidá en telón cine Los Campos

Na imaxe podemos ver un telón publicitariu del Teatru-Circu Obdulia" de Xixón, qu'asina se llamó dende los sos entamos en 1876 hasta 1930 que pasó a denominase "Cine Campos Elíseos" más conocíu como'l "Cine Los Campos".

En dichu telón publicitariu na parte inferior derecha consiguimos ver un anunciu de "Receptor Philips" de la "Sección Comercial d'Hidroeléctrica del Cantábricu" polo que puede datase que ye posterior a 1942 (fecha na que "Hidroeléctrica del Cantábricu" absuerbe a la "Cía. Popular de Gas y Eletricidá").

Telón publicitariu del Cine Los Campos

Fonte: miGijón (migijon.com)
Gracies a Roberto Gª Rogero pola información

Derribu Fábrica del Gas de Xixón

Viaxamos otra vegada nel tiempu, esta vegada 34 años tras, 20 de xineru de 1988, en plenu valtamientu de la Fábrica del Gas de Xixón, como vemos nesti retayu del diariu La Nueva España

Construyida en 1870 so la dirección d'obra de Francisco Saumier. En 1889 constrúyese xuna nueva sala de fornos, auméntense los aparatos de condensación y depuración, según un gasómetru de 2.000 metros cuadraos que foi construyíu nun taller de Xixón

Artículu de La Nueva España 20 xineru 1988

 La Fábrica del Gas de Xixón taba asitiada ente les cais; Ezcurdia con Emilio Tuya y Menéndez Pelayo con Canga Argüelles, no que güei ye'l Parque de la Fábrica del Gas. 

Semeya de Ramón González para La Nueva España

Na siguiente semeya vemos el "contadorón" mientres el valtamientu de la fábrica, con esti equipu midía'l volume de gas que salía de la fábrica escontra la rede de distribución, podemos saber más de la so hestoria en: Electrogas.org: El Contadorón

Fontes: 

• Hemeroteca de la Nueva España
• Santana, J. (1989). Asturias: Una historia de gas de alumbrado (1. ed.).
• Semeya"contadorón" Juan Ignacio Rey

Volvemos consultar la llotería de Navidá en Electrogás Avilés

Un añu más volvemos a la plaza de Pedro Menéndez para consultar la llotería de Navidá, una tradición d'aquella dómina anterior a la llegada de los sorteos en directu pola televisión.

Día Internacional de la Radio y la Televisión a favor de la Infancia

El segundu sábadu d'avientu celébrase el "Día Internacional de la Radio y la Televisión a favor de la Infancia" y que meyor forma de celebralo que recordando a "Los Chiripitifláuticos" para ello vamos remontanos 50 años tras (13 abril de 1971) para asistir a la grabación en Llaranes (Avilés) de lo que foi'l so últimu programa, emitíu'l 1 de mayu de 1971, poniendo fin a esti míticu programa infantil.

Mira equí la noticia "Avilés fue Chiripitifláutico" publicáu nel diariu EL COMERCIO el 9 d'abril de 2016

Y para ver esti programa naquella dómina, que meyor qu'una televisión mercada en Electrogás d'Avilés, como los d'esti escaparate del 26 de setiembre de 1964.

Escaparate Electrogás Avilés 26-09-1964

La fonte del parque

El pasáu 9 payares 2021 nel diariu LA VOZ DE AVILÉS na so sección AVILÉS DE AYER, publicábase un artículu de fai 50 años (payares 1971) onde se dicía que la fonte de la plaza Pedro Menéndez empezara a echar agua a chorru llimpio dempués de la llimpieza, pos taba llena de bichos, agua puerco y mofu.

A tenor d'esta noticia di una vuelta pol parque y saqué una semeya de la fonte na actualidá, cola oficina de Total Energies al fondu y con tola obra que tien alredor.

Nada que ver cola siguiente semeya de la dómina de la so inauguración en 1956, nella puédese ver al fondu la tienda de Electrogás (Sección Comercial d'Hidroeléctrica del Cantábrico) colos sos rótulos de Radio Luz" y "Philips".

65 años dixebren dambes semeyes onde puede vese la evolución del edificiu de Electrogás, que güei ye de Total Energies.

Bulevar Electra

Nel diariu EL COMERCIO de güei  domingu 5 avientu 2021 na so sección del VIEJO GIJÓN fai ecu d'una noticia de fai 25 años (avientu 1996) referente a la inauguración d'un centru comercial nel Bulevar Electra.

Dende equí voi recordar que dolce años antes empezaba'l desmontaje de la chimenea de lo que fuera la central térmica de LA ELECTRA

Semeya onde podemos ver la chimenea del almacén de Saavedra que formaba parte de la central térmica de LA ELECTRA.

Güei nesta zona atopa'l mentáu Bulevar Electra

- Semeyes por Miguel Ángel García Amado -

Día internacional de la televisión

Güei 21 de payares celébrase´l día internacional de la televisión, punxi a buscar y atopé esti anunciu de ELECTROGÁS publicáu n´EL COMERCIU de Xixón el 29 de mayu de 1960

Anunciu d'EL COMERCIU 29 mayu 1960

L'anunciu señala que; la llegada de la televisión representa un fuerte desembolsu que puede alteriar el presupuestu familiar para aquelles persones que se decidan a adquirir una televisión, por ello ufierta abrir una cuenta corriente onde ingresar cantidaes fixes o variables a cuenta d'una televisión PHILIPS, coles mesmes tamién fai referencia a que les primeres televisiones que s'apurran nun van llevar recargu de mano d'obra pola instalación de l'antena.

Y falando d'instalación d'antenes, vamos recordar aquellos pioneros n'instalar repetidores polos altos de los pueblos, por que los vecinos d'estos pudieren ver tamién la televisión, nesti casu ye de la instalación en La Nueva (Sama) el día 30 de xunetu de 1970

Preparando los materiales...

Instalando'l mástil y les antenes 

Empobinando les antenes para meyor recepción

Y tamién vamos recordar el primer cursu d'arreglu de televisiones celebráu en 1963 nes instalaciones de la Fundación Revillaxixéu de Xixón, cursu impartíu pol Padre Román

Cursu reparación televisores en 1963

Versión en castellano https://www.electrogas.org/2021/11/dia-internacional-de-la-television.html

La nuesa Señora de la Lluz

Güei 1 de xunu, celébrase la festividá de La nuesa Señora de la Lluz, ye la patrona de los emplegaos del gas y de la eletricidá. 

Yá comentamos enantes (en https://bit.ly/candelaria-1964) que nun principiu se celebraba como patrona la festividá de La Candelaria y darréu pasóse la festividá a La nuesa Señora de la Lluz, ye dicir pasar del 2 de febreru al 1 de xunu.

 Na semeya podemos ver la imaxe de La nuesa Señora de la Lluz que presidía la see del Sindicatu d'Agua Gas y Eletricidá" de Madrid.

A tenor d'esto recuerdo una anécdota; corria xineru del añu 1974 (inda vivía Franco) cuando empecé a trabayar en Electrogás (Sección Comercial d'Hidroeléctrica del Cantábricu), a los pocos díes dizme Sergio Fombona (que s'encargaba de les temes de personal) que tengo que dir dame d'alta a "La Sindical", pero aprofióme perbién, de que teníen qu'apuntame al Sindicatu d'Agua Gas y Eletricidá, yá que trabayaba n'Hidroeléctrica del Cantábricu, pero como Electrogás yera una tienda, cabía la posibilidá que m'apuntaren al Sindicatu de Comerciu y eso podía acarretar futuros problemes,  asina qu'a la fin llegué col mio carné d'afiliáu a Agua Gas y Eletricidá.

Como se ve, yera un sindicatu obligatorio y único, que s'estremaba en cañes profesionales. Yeren otros tiempos.

Al respective de la festividá de "La Patrona", n'Hidroeléctrica del Cantábricu, nun conveniu de los años 80 fíxose un cambéu por que nun cayera de sábadu o domingu y perdiérase la fiesta, pasando a denominase "Día de la Enerxía" foi traladado el festivu al primer llunes de xunu.

Llega'l videocasete al mercáu

Güei na sección del "Viejo Xixón" nel diariu de "El Comerciu" figura esta noticia de fai 50 años

Y a tenor d'esta noticia viaxamos al añu 1971.  

Ye n'anguaño cuando Philips presenta'l primer vídeu VCR 2000 y ye en 1972 cuando Philips presenta la primera videograbadora a nivel de consumidor, la VCR Philips N1500, -y seguiran col mesmu sistema, Grundig y Bang & Olufsen.

Reproductor Philips VR2020

Darréu surden otros formaos domésticos como'l Betamax y el VHS, llegando asina a xenerar una guerra de formatos, siendo'l primer sistema en cayer el video-2000 que dexó de fabricase en 1988, al añu siguiente Sony da en descontinuar el so formatu Betamax, quedando como ganador el formatu VHS

Videograbador Philips VR 2340

 

 

Volviendo a la noticia de "El Comerciu", na década de los 80 (que ye cuando se populariza) un videograbador andaba por 100.000 pesetes o más, una cinta virxe alredor de 1.000 a 1.500 pesetes (según duración de la cinta) y una película grabada de 10.000 a 12.000 pesetes.

D'esta forma surdieron los primeros videoclubs, onde pagando una cuota mensual podíes camudar una película de la to propiedá, teniendo asina la oportunidá de poder ver una película al día o a la selmana según la cuota que se pagaba.

Anguaño tou esto quedónos bien tras, yá que ye tou dixital y tenemos unes cuantes plataformes para ver películes y series, pero fíxome recordar esos años de Electrogás nos que empezabamos a ver la meyora de la tecnoloxía.

Y como datu interesáu la palabra videocasete (con una sola "t") figura nel diccionariu de la RAE con dos acepciones, la primera para definir l'aparatu y solamente en masculín (el videocasete) y la segunda acepción ye para definir la cinta de video, siendo válidu nesti casu tantu'l masculín (el videocasete) como'l femenín (la videocasete).

De Electricista de Carbayín a Electra Norte

1923 Empieza a operar, por iniciativa de D. Perfecto Díaz Díaz, una empresa de distribución elléctrica na localidá de Candín nel conceyu de Siero. Nos sos empiezos apurría fluyíu elléctricu a menos d'un centenar de vecinos de Carbayín, Areñes, El Cotu, El Rosellón y Candín.

D. Perfecto Díaz Díaz

1928 La empresa pasa a denominase “Electricista de Carbayín”.

Recibos emitidos a clientes de base fija y por contador en los años treinta

1965 Camuda la so denominación a “Electra de Carbayín” y en 1985 tresfórmase en Sociedá Anónima.

1997 Constitúyese “Electra Norte 1997, S.A.”  al envís d'ampliar y reorganizar l'ámbitu operativu en tolos ordes.

1998 Electra de Carbayín ufierta a los sos veceros la posibilidá d'escoyer si deseyen recibir les sos factures en castellán o n'asturianu.

2003 Electra Norte empieza a comercializar enerxía elléctrica verde, sofitada por un sistema propiu de garantía d'orixe anovable, tantu a veceros industriales como domésticos. La Comisión Nacional d'Enerxía sofita nesti sentíu a Electra Norte al empar que pon oxeciones a ufiertes d'enerxía verde d'Iberdrola y Endesa.

2005 Constitúyese'l holding “Candín Energía, S.L.”

2007 Electra Norte pasa a ser la marca comercial principal y www.electra.es el so dominiu d'internet.

2009 Electra de Carbayín dexa de vender enerxía al consumidor final, pasando esta actividá a Electra Norte.

2021 La firma qu'empecipió la so andadura en Candín fai 98 años sigue dedicada al negociu elléctricu, enraigonada n'Asturies y calteniendo el so calter familiar, pero tresformóse nun grupu empresarial elléctricu con presencia nos negocios de promoción, xeneración, redes y comercialización, tantu n'España como nel estranxeru.

Fonte: Loredo Fernández, Enrique (Coordinador). ELECTRA NORTE Con La Energía de 90 Años (1923-2013), 2013.

Central térmica La Electra

Central térmica de La Electra, barriu d'El Llanu, Xixón

Central térmica inagurada en 1890 pola Sociedá Electra Industrial de Gijón, siendo Lorenzo Moret el presidente del conseyu d'alministración.

Foi construyida estratégicamente pos, per un sitiu recibía'l carbón pola llamada carretera carbonera y per otru llau suministraba enerxía elléctrica a les zones de Puerta de la Villa y centru de Xixón amás de les numberoses fábriques que naquella dómina asitiábense na zona industrial del Llanu.

  Zona fabril El Llanu

• Fábrica de Orueta (1885) dedicada a la fabricación de forxes, palas metáliques que llegó a fabricar vagones de tren, esta fábrica tenía gran cantidá d'obreros.
• La Positiva, fabrica de mosaicos
  
• Condal, fabrica de xabones
  
• Visnú, fabrica de productos de guapura
  
• La Primitiva Indiana, fábrica de chocolates
  
• Unión Cantábrica, fábrica de cames
  
• La Suiza, fábrica de bombones

En 1906 la Sociedá Electra Industrial de Gijón ye sorbida pola Compañía Popular de Gas y Electricidad.

En 1909 ellectrifícase la tranvía de Xixón, corriendo'l suministru elléctricu al cargu de la central de La Electra.

 En 1942 la Compañía Popular de Gas y Electricidad ye sorbida por Hidroeléctrica del Cantábrico, S.A.

En 1954 la central La Electra dexó de funcionar al conectase la Subestación de Pumarín col Saltu de Salime.

Cuando esta central térmica cesó la so actividá elléctrica, convirtióse n'almacén de Electrogás y el so parque de carbones n'almacén d'Hidroeléctrica del Cantábrico, para les bobines de cable, postes de castañal, columnes de formigón y otru material avolumao.

En payares de 1984 comencipia'l desmontaxe de la chimenea y el so posterior esmantelamientu.

D'esta central namás queda l'alcordanza del so nome na cai Electra y el Parque de la Fábrica de la Lluz, asitiáu nel mesmu llugar onde taba allugada.

Cursu d'arreglu de televisiones

Güei tráigovos una nueva semeya del cursu d'arreglu de televisiones pa emplegaos de Electrogás y distribuidores Philips n'Asturies, el cursu celebrose'n 1963 na Fundación Revillagigedo de Xixón.

Na semeya, el profesor ye'l sacerdote xesuita ya inxenieru Padre Román, que darréu dio clases na Fundación Revillagigedo a la primer promoción de maestros industriales electrónicos d'Asturies, 1963/1968. 

Foto del cursu d'arreglu de televisiones en 1963

 

Tamos al recibir

"Tamos al recibir" yera la frase que teníamos en Electrogás cuando daquién preguntábanos por mercancía que taba escosada, equí tenemos un exemplu de como nel añu 1956, por cuenta de les Fiestes de Navidá, en toa Asturies nun había onde mercar una máquina d'afaitar de Philips

Estimamos el detalle de: recuerdogijon.blogspot.com.es por mentanos y gracies a Mauro qu'alcontró esta alcordanza.

Paré Philips

Sí, esta vegada tóca-y la vez a una paré con un anunciu de Philips.

Ta asitiada en Villaviciosa, al llau del Conventu de Les Clarises, como podéis ver poles semeyes ye d'azulexos y anque ta bastante deterioráu pol pasu del tiempu, inda puede vese na so totalidá.

- Semeyes cedíes por Ángel Canal Solares -